Во претходните четири дена, учесниците/чките на овогодинешниот USAID BMAP Media Innovation Lab имаа можност да работат врз развивањето на своите идеи со навистина одличен тим на ментори/ки кои го понудија своето долгогодишно стручно знаење од областа на новинарството, дигиталниот маркетинг, психологијата, дата новинарството, дигиталните и социјалните медиуми и особено општествениот активизам. За тоа сведочи и фактот дека токму за време на одржувањето на MIL-от менторот Горјан Јовановски ја доби наградата Европски млад иноватор 2020 во категоријата на млади до 30 години на European Young Innovators фестивалот за апликацијата AirCare – Air Quality App. Горјан Јовановски е млад иноватор, кој во раните деведесетти ја креирал апликацијата која ја мери загаденоста на воздухот, што ја користат преку половина милион луѓе во целиот свет, а која покренала многу други општествено корисни проекти и апликации. Му честитаме на Горјан за оваа награда и му посакуваме уште многу успешни проекти во наредните години. Дополнително е важно да се нагласи дека овогодинешниот MIL беше голема размена на знаења помеѓу сите учесници/чки во овој возбудлив, но и напорен процес.
Трите најдобри идеи на MIL 2020
Овогодинешните учесници/чки на Media Innovation Lab интензивно работеа врз измените и дополнувањата на своите проекти, обидувајќи се да ги вклучат сите потребни аспекти за проектите да бидат иновативни и за во целост да ја отсликуваат овогодинешната тема на Lab-от – етичко известување во текот на пандемија.
Сите шест проекти кои се натпреваруваа направија одлична работа во развивањето на своите идеи, а петчленото жири одлучи на овогодинешниот USAID BMAP Media Innovation Lab поддршката да ја добијат следните три проекти.
Action for Democratic Society од Косово сакаат да воспостават алатка за проверка на факти и вистинитоста на статиите поврзани со Ковид-19. Низ оваа поставка на страницата планираат со случаен избор да одберат 5 статии дневно кои ќе им бидат достапни на корисниците за проценка.
Публиката ќе има можност преку оваа алатка да учи за етичките стандарди во новинарството, и активно да учествува во оценувањето на статиите во согласност со тие стандарди.
Секој учесник ќе има личен профил, и на тој начин ќе ги гради своето знаење и способности за оценување на статиите, и како што ќе бидат повисоко рангирани ќе имаат можност за евалуација на статиите на највисоко ниво на етичките новинарски стандарди.
Нивната целна група се генерално корисниците/чките на медиумите, но планираат да ја интегрираат нивната апликација меѓу специфични групи како што се студентите/ките и професорите/ките по новинарство.
Ермин Сочо од Босна и Херцеговина, заедно со својот тим сака да креира онлајн платформа со напредна визуелизација на податоците користејќи се со дата новинарство.
Со цел за колку што е можно подобро етичко известување, нивниот план е преку соодветна методологија, извори на податоци, кредибилноста и крајниот корисник/чка да понудат сервис кој јасно и едноставно визуелно ќе ги претставува податоците поврзани со пандемијата.
Covidmembrance Project од Северна Македонија, заедно со својот тим сака да работи врз мултимедиумски проект кој го нарекле „Covidmembrance“, а кој би се состоел од пет кратки документарни филмови. Приказните кои би ги опфаќал проектот би се однесувале на различните аспекти предизвикани од социо-економските, културните и психолошките промени кои го донела пандемијата со Ковид-19.
Нивната платформа ќе биде интерактивна и ќе поседува различни категории преку кои публиката ќе има можност да се вклучи во овој проект.
Повеќе за нивните идеи ќе имате можност да читате наскоро.
