На прво место сме на Google за тој клучен збор, имаме XY кликови само од тој резултат.
Ова е изјавата на сопственикот на медиумот со кој разговарав.
Резултат на неговото одушевување е фактот што сообраќајот го мереле во вакуум.
Во тоа мерење нема контекст што ќе покаже дека навистина се на прво место за клучниот збор XY кој носи кликови, дека стапката на напуштање (bounce rate) е 95% бидејќи намерата на читателите (search intent) не е во согласност со овој резултат на Google. Се разбира, во Google Analytics 4 (GA4) стапката на напуштање е заменета со попрецизна мерка engagement rate, која во овој случај би била 15%, но тоа не ја менува суштината на овој наратив.
Луѓето доаѓаат, гледаат и продолжуваат понатаму.
Стапката на напуштање не би претставувала толку голем проблем доколку времето на задржување би било подолго од неколку секунди, но не е така во овој случај. (Dwell time е времето кое лицето ќе го помине гледајќи ја веб-страницата откако кликнало на врската на Google, но пред да кликне назад на Google).
Што мериме и зошто кликовите не се релевантна метрика?
Мерењето на сообраќајот на веб-страницата го започнуваме со неколку прашања:
- како е дојдена публиката на нашата веб-страница
- однесувањето на публиката на веб-страницата
- која е публиката што ја чита содржината
Мерењата на изворот на сообраќај имаат врска со советот никогаш да не ги ставате сите јајца во иста корпа.
Ниту еден бизнис, па ниту медиумскиот, не смее да си дозволи да зависи од еден извор на сообраќај односно заработка.
Сообраќај од различни извори подразбира: директни посети со внесување на името на медиумот во пребарувачот (најмногу корист од оваа опција имаат веќе изградените медиумски брендови), SEO, препораки, социјални мрежи, push известувања, кампањи.
Бројот на споделувања на социјалните мрежи го покажува бројот на споделувања на линкот на вашата статија на социјалните мрежи и на различни платформи, без разлика дали нив ги споделува медиумскиот тим или публиката.
SEO или органски сообраќај е сообраќајот што доаѓа бесплатно благодарение на позицијата на пребарувачот (95% од пребарувањата отпаѓаат на Google).
Билтените во кои споделуваме врски (линкови) до статиите можат да бидат одлична можност за персонализација на содржината што публиката сака да ја види во нивната е-пошта, а можеби е и првиот чекор кон претплатата.
Кампањите на социјалните мрежи и во другите медиуми помагаат во промоцијата на одредена приказна.
Бројките од секој од овие извори на сообраќај ќе ни помогнат да разбереме какви резултати имаме и колку тоа го оправдува инвестирањето во креирањето на содржините.
Социјалните мрежи и промотивните кампањи на мрежите ни помагаат во краткорочното привлекување на публиката, но овој пристап кој бара постојано присуство и ангажман не е одржлив бидејќи е скап. Додека креирате содржини за мрежите и плаќате за реклами, имате посети. Штом ќе заврши кампањата, престануваат и посетите.
За разлика од овој пристап, SEO на квалитетната содржина ѝ дава можност со години да носи посети, но SEO е бавен. Не можете да очекувате резултати за краток временски период.
Секој од овие извори на сообраќај е потребен, а аналитиката ќе ни покаже на кој извор да му дадеме приоритет во некој период од годината.
Однесувањето на публиката на веб-страницата го покажуваат метриките за кои зборувавме во претходните текстови.
Просечно траење на сесијата е времето кое вашата публика ќе го помине на веб-страницата. Ова е една од поважните метрики, особено во понудите за огласувачите.
Стапката на напуштање на страницата е бројот на посетители/ки кои заминале без да преземат какво било дејство. Овој податок може да биде исклучително важен за SEO оптимизацијата. Високата стапка на напуштање може да значи дека публиката не го нашла она што ѝ било потребно. Ако имате значителен број на посети од некој клучен збор и висока стапка на напуштање, ова е можност за уредување на постоечкиот текст. Ако на истата URL-адреса се објави уредениот текст, тогаш сообраќајот може да се задржи, но овој пат со зголемување на времето што ќе го поминат читателите на страницата.
Dwell time или време на задржување е метриката што ја гледаме заедно со стапката на напуштање.
Ако имаме висока стапка на напуштање, но времето поминато на таа содржина е неколку минути, тоа е добар знак за Google. Ако читателот/ката се задржал/а толку долго на вашата веб-страница, тоа значи дека тој/таа го пронашол/а одговорот што го барал/а.
Процентот на нови корисници/чки ќе ни помогне да разбереме кои содржини и извори на сообраќај ни носат нови, а кои стари посетители/ки. Ако сакате да го зголемите бројот на посети на веб-страницата и да привлечете нови луѓе во вашиот медиум, прво треба да ги анализирате овие бројки.
Лајкувањето и споделувањето ни ја покажува интеракцијата што ја има публиката со медиумските содржини. Од друга страна лицето кое лајкува и споделува, почесто ќе ја гледа нашата содржина на мрежите бидејќи така функционира алгоритамот.
Коментарите што ги оставаат луѓето на статиите се посебен вид на интеракција што може да ѝ помогне на редакцијата, но и на градењето на медиумската заедница.
Податоците за публиката ни кажуваат од каде доаѓаат, кој доаѓа и се многу релевантни за проценка на потенцијалот на приходите на платформата.
Локацијата и јазикот од каде доаѓаат корисниците/чките.
Пребарувачот, оперативниот систем и технологијата што ги користат посетителите/ките се податоци кои помагаат за оптимизација на страницата за подобри перформанси за поголемиот дел од публиката (подобри перформанси првенствено значи брзина на вчитување).
Демографските податоци подразбираат возрасна група, пол и остварен приход.
Интересите на публиката покажуваат податок што може да помогне во таргетирањето на подобри реклами или во креирањето на SEO содржини.
Метриките имаат директна врска со финансиите на медиумите
Редовната анализа на метриките им помага на медиумите да ја анализираат содржината и да носат информирани одлуки за креирање на содржината и за планирање на рекламите. Сепак, ова не е примарна улога на мерењето.
Остварувањето на приход е директно поврзано со квалитетот на мерењето и со толкувањето на бројките.
Кога ќе ги измериме основните елементи на веб-страницата на медиумот, доаѓаме до најважната метрика, а тоа е приходот што го генерираат страниците.
Квалитетно поставените цели и кампањи во алатките за мерење (Google Analytics е стандард) ни покажуваат кои содржини остваруваат приходи.
Приходот по страница го мериме во зависност од тоа каква цел сме поставиле за таа страница.
Ако страницата ја оптимизираме за кликнување на копчето “стани претплатник”, тогаш знаеме колку приход ни носи секој претплатник, и во аналитиката сме поставиле цел во согласност со овие бројки. Секое кликнување е остварена цел од XY пари.
Приходите од кликнувањата на рекламите се цел на страниците кои имаат голем сообраќај и не им е потребна многу дополнителна промоција за да се генерираат кликови.
Приходот на страницата треба да го гледаме низ лупата на она што е инвестирано за креирање и за промоција на содржината.
Со вака прецизни мерења на публиката и на нејзиното однесување, промоциите на содржината и трошоците на редакцијата, платформата на метриката веќе не се бројки туку се конкретна сума на пари.
Вредноста што ја создава медиумот за публиката може подобро да се разбере со поставување, следење и донесување на информирани одлуки со овие бројки.
Што ќе правиме со бројот на кликови?
Бројот на кликови станува непотребна метрика која не нуди информација врз основа на која се гради добра содржина и финансиска проекција за следниот квартал.
