Во март оваа година, Microsoft, USAID и Internews најавија ново јавно-приватно партнерство за развој на Акцелераторот за медиумска одржливост (Media Viability Accelerator – MVA) за да им помогнат на независните медиуми ширум светот да станат финансиски поодржливи преку пристапот до пазарните увиди и деловните решенија. Новата веб платформа ќе ги обединува податоците од медиумските организации ширум светот за да им овозможи на независните редакции да откријат што функционира за другите и да ги применат тие знаења во нивната работа.
Во партнерство со иницијативата на Microsoft, Democracy Forward, за врвни алатки за собирање на податоци и визуелизација, MVA ќе понуди еден вид на пазарна интелигенција која им е потребна на медиумските куќи за да можат да бидат финансиски одржливи.
Медиумите кои ќе учествуваат ќе учат бесплатно од заедницата на еднаквите членки, ќе пристапат до повеќејазична алатка која ги визуелизира податоците за перформансите на медиумот и ќе примаат секојдневни предупредувања засновани на илјадници пазарни и медиумски извори. Ова може да ги вклучува научените лекции за тоа како да се остане одржлив во руралните заедници или примери за она што успеало преку локалните променливи економски услови.
По стартувањето, 500 независни медиумски организации ширум светот ќе можат да го користат Media Viability Accelerator-от за да ја поддржат нивната мисија за да ѝ обезбедат на јавноста веродостојни информации.
MVA им е наменет на медиумите, финансиерите, инвеститорите/ките, технолозите, консултантите/ките, телата за акредитација, медиумските здруженија, истражувачите/ките, академските работници/чки и на многу други.
За време на овогодинешниот BMAP Forward медиумски форум на USAID, Jason Lambert, виш директор за медиумско работење во Internews, подетално зборуваше за Акцелераторот за медиумска одржливост и за неговата корисност за медиумските организации.
Во продолжение слушнете ја неговата презентација:
Презентацијата е на англиски јазик, но можете да вклучите титлови на вашиот јазик.
Доколку повеќе ви одговара да ја слушате презентацијата на вашиот јазик, за вас подготвивме снимка со аудио превод.
