Интерактивните мапи како моќна алатка во новинарството им овозможуваат на медиумите да ги презентираат податоците на начин кој ќе биде интересен, информативен и впечатлив за публиката. Преку овозможувањето на визуелен контекст и на интеракција со податоците во реално време, мапите можат да помогнат за да се оживеат приказните и даваат подлабоко разбирање на сложените проблеми.
Претходно зборувавме за многу корисни алатки за интерактивни мапи, како што се Datawrapper, Visme, Tilegrams, Flourish и Mapme.
Интерактивните мапи имаат многу предности и сигурно е дека можат многу да им помогнат на медиумите во креирањето на интересна и привлечна содржина за публиката.
Mapbox алатка за интерактивни мапи
Mapbox е алатка која им овозможува на новинарите/ките да креираат и да објавуваат интерактивни мапи на нивните веб-страници или во нивните статии. Како веб базирана платформа за креирање на мапи, Mapbox нуди алатки за креирање на приспособени, интерактивни мапи и визуелизација на податоците. Алатката ја користат новинари/ки, програмери/ки и компании за креирање на визуелно привлечни мапи.
Алатката вклучува приспособен стил кој обезбедува широк опсег на однапред направени стилови на мапи кои корисниците/чките можат да ги приспособат на нивните потреби. Корисниците/чките можат да избираат меѓу различните карактеристики на мапите, боите и фонтовите за да создадат уникатен изглед и чувство за нивните мапи.
Mapbox им овозможува на корисниците/чките да ги подредат податоците на нивните мапи во различни формати, вклучувајќи топлински мапи, кластери на точки и слично. Ова го олеснува креирањето на визуелизации на податоците кои нудат увид во сложените збирки на податоци. Алатката исто така нуди и услуги за геокодирање кои им овозможуваат на корисниците/чките да ги конвертираат адресите во географски координати, кои можат да се користат за креирање на услуги и на апликации што се базирани на локација.
Mapbox е дијзаниран за да биде приспособен на мобилните уреди, што го олеснува креирањето на мапи кои можат да се гледаат на различни уреди.
Предности и недостатоци
Како и секое квалитетно решение од овој тип и MapBox има свои предности и недостатоци. Во продолжение ви презентираме некои од предностите и недостатоците од користењето на оваа алатка во новинарството.
Предности:
· Подобрено раскажување: Со интерактивното и визуелно привлечното раскажување преку мапите, оваа алатка нуди можност за презентирање на комплексни приказни и податоци на едноставен начин.
· Приспособливо: Алатката нуди висок степен на приспособување, овозможувајќи им на новинарите/ките да ги приспособат нивните мапи на специфичните потреби на нивната приказна. Ова вклучува опции за различни основни мапи, бои, стилови и преклопување на податоците.
· Соработка: Mapbox овозможува соработка со други новинари/ки, што може да помогне да се поедностави процесот на креирање и на објавување на мапите.
· Интеграција: Mapbox може лесно да се интегрира со другите алатки за визуелизација на податоците, како што се Tableau или Excel, што го олеснува увозот на податоците и креирањето на мапите.
· Пристапност: Mapbox е дизајниран за да биде достапен и приспособлив за сите уреди, вклучувајќи ги десктоп компјутерите, таблетите и паметните телефони, а на публиката ова ѝ го олеснува пристапот и интеракцијата со мапите.
Недостатоци:
· Потребни технички вештини: Користењето на Mapbox бара определени технички вештини и знаења за кодирање, што може да биде пречка за некои новинари/ки кои можеби не се вешти со кодирањето.
· Цена: Mapbox нуди бесплатни и платени планови, но за некои од понапредните функции и опции за приспособување може да биде потребна платена претплата, што може да биде скапо за медиумите со мал буџет.
· Одржување: На Mapbox мапите им е потребно постојано одржување и ажурирање, што може да биде долготрајно и потребно е техничко знаење.
Нова опција за раскажување
Интерактивното раскажување на Mapbox (storytelling) е решение кое е дизајнирано за да им помогне на новинарите/ките и на медиумските организации да креираат интерактивни и визуелно привлечни приказни користејќи мапи и визуелизации на податоците. Оваа алатка им овозможува на новинарите/ките да раскажуваат приказни кои не се само интересни, туку се и информативни и се базираат на податоци.
Користејќи приспособливи шаблони, новинарите/ките можат брзо и едноставно да креираат раскажувачки приказни. Приспособливоста се гледа во менувањето на бојата, фонтот и стиловите на елементите на приказната.
Раскажувачката алатка е дизајнирана за да биде едноставна за користење, дури и за оние кои немаат напредни технички вештини. Новинарите/ките можат лесно да креираат и да објавуваат приказни користејќи го drag-and-drop интерфејсот на платформата.
И оваа опција е приспособена на сите уреди, па така корисничкото искуство ќе биде целосно.
Mapbox storytelling-от нуди и аналитички алатки кои им овозможуваат на медиумите да го следат ангажманот со нивните приказни и да го мерат нивното влијание.
Генерално, интерактивното раскажување на Mapbox им нуди на медиумите ефикасен начин да ги раскажат приказните што се базирани на податоци кои се интересни, информативни и визуелно уверливи. Корисничкиот интерфејс на платформата, приспособливите шаблони и алатките за визуелизација на податоците ја прават моќна алатка за новинарите/ките и за медиумските организации кои сакаат да создадат интерактивни приказни.
Цена
Mapbox нуди и бесплатни и платени планови, во зависност од вашите лични цели базирани на користењето и на потребните функции.
Секоја услуга е приспособена на корисникот/чката и на нивните потреби, па од тоа ќе зависи и цената на пакетот.
Можете да ги користите и бесплатните можности, а доколку одлучите да ги користите платените верзии, тогаш го плаќате само тоа што го користите. Како што се зголемува вашиот обем на користење, автоматски ќе добиете количински попусти и дополнителни попусти за годишни обврски.
На крајот можеме да заклучиме дека MapBox им дава доволно простор на новинарите/ките и на редакциите за почетно експериментирање и за повремена употреба на платформата за визуелно да ги раскажат нивните приказни. Од друга страна, оваа платформа е доволно голема и може да се прошири за да ги задоволи потребите дури и на оние редакции што најмногу бараат а кои се во потрага по ваков тип на алатка, за со комбинација на географските податоци да ѝ понудат на нивната публика што е можно подобра и поиновативна содржина.
